ആഘോഷങ്ങളുടെ ഭാഗമായി നടന്ന വിശുദ്ധ കുര്‍ബാനയ്ക്ക് മലങ്കര കത്തോലിക്കാ സഭയുടെ അഭിവന്ദ്യ ബിഷപ്പ് എമിരിറ്റസ് ഡോ. ജോഷ്വാ മാര്‍ ഇഗ്നാത്തിയോസ് മുഖ്യകാര്‍മ്മികത്വം വഹിച്ചു. ജര്‍മ്മനിയിലെ മലങ്കര കത്തോലിക്കരുടെ കോ~ഓര്‍ഡിനേറ്റര്‍ കോര്‍ എപ്പിസ്കോപ്പ ഫാ. സന്തോഷ് തോമസ് കോയിക്കല്‍, അസോസിയേറ്റ് കോ~ഓര്‍ഡിനേറ്ററും ബോണ്‍ സെന്റ് തോമസ് മലങ്കര കത്തോലിക്കാ ഇടവക വികാരിയുമായ റവ. ഡോ. ജോസഫ് ചേലമ്പറമ്പത്ത്, കമ്മ്യൂണിയോ ഇന്‍ ക്രിസ്തോ ജനറല്‍ സുപ്പീരിയര്‍ ഫാ. ജെയ്സണ്‍ താഴത്തേല്‍, ഫാ. ജോബിന്‍ പുന്തലവിളയില്‍, ഫാ. സാമുവല്‍ പറവിലയില്‍, ഫാ. ബിനോയ് കൊച്ചുകരിക്കാത്തില്‍, ഫാ. സുബിന്‍ ചാലില്‍ എന്നിവര്‍ സഹകാര്‍മ്മികരായി.
ഉപവി~നീതി വര്‍ഷത്തിന് തുടക്കം; ലോഗോ പ്രകാശനം ചെയ്തു
മലങ്കര സുറിയാനി കത്തോലിക്കാ സഭയുടെ പുനരൈക്യ ശതാബ്ദി ആഘോഷങ്ങളുടെ മുന്നൊരുക്കമായി, 2026 സെപ്റ്റംബര്‍ 20 മുതല്‍ 2027 സെപ്റ്റംബര്‍ 19 വരെ പ്രഖ്യാപിച്ചിട്ടുള്ള ഉപവി~നീതി വര്‍ഷത്തിന്റെ (Year of Charity & Justice) റീജിയണല്‍ തല ഉദ്ഘാടനവും ലോഗോ പ്രകാശനവും ചടങ്ങില്‍ നടന്നു. 'നീയും പോയി അതുപോലെ ചെയ്യുക' (ലൂക്കാ 10:37) എന്ന ക്രിസ്തുവചനം ജീവിതത്തില്‍ സാക്ഷാത്കരിച്ച്, കരുണയിലും നീതിയിലും അധിഷ്ഠിതമായ ഒരു സാക്ഷ്യ ജീവിതത്തിലേക്ക് വിശ്വാസികളെ നയിക്കുക എന്നതാണ് ഈ വര്‍ഷാചരണത്തിന്റെ മുഖ്യ ലക്ഷ്യം.
പുതിയ ചാപ്ളിന്‍ നിയമനങ്ങളും ആദരവും
വിശുദ്ധ കുര്‍ബാനയ്ക്ക് ശേഷം നടന്ന പൊതുസമ്മേളനത്തില്‍ അഭി. ബിഷപ്പ് ഡോ. ജോഷ്വാ മാര്‍ ഇഗ്നാത്തിയോസ്, കോര്‍ എപ്പിസ്കോപ്പ ഫാ. സന്തോഷ് തോമസ്, റവ. ഡോ. ജോസഫ് ചേലമ്പറമ്പത്ത്, കൊളോണ്‍ അതിരൂപതയിലെ ഇന്റര്‍നാഷണല്‍ കാത്തലിക്സ് വിഭാഗം പ്രതിനിധി ഇങ്ബര്‍ട്ട് മ്യൂഹെ, ജര്‍മ്മനിയിലെ പാസ്റററല്‍ കൗണ്‍സില്‍ വൈസ് പ്രസിഡന്റ് അരുണ്‍ പാലത്തിങ്കല്‍, വര്‍ഗീസ് കര്‍ണ്ണാട്ടേശേരില്‍ എന്നിവര്‍ പ്രസംഗിച്ചു.
ജര്‍മ്മനിയിലെ മലങ്കര കത്തോലിക്കാ മിഷനുകളിലെ പുതിയ ചാപ്ളിന്‍ നിയമനങ്ങളും ചടങ്ങില്‍ പ്രഖ്യാപിച്ചു. മൈന്‍സ് മിഷനിലേക്ക് ഫാ. എല്‍ദോയെയും, ബര്‍ലിന്‍ മിഷനിലേക്ക് ഫാ. ജോബിന്‍ പുന്തലവിളയിലിനെയും പുതിയ ചാപ്ളിന്മാരായി നിയമിച്ചു. കോര്‍ എപ്പിസ്കോപ്പ സ്ഥാനത്തേക്ക് ഉയര്‍ത്തപ്പെട്ട ഫാ. സന്തോഷ് തോമസ് കോയിക്കലിനെയും, അസോസിയേറ്റ് കോര്‍ഡിനേറ്ററായി നിയമിതനായ ഫാ. ജോസഫ് ചേലമ്പറമ്പത്തിനെയും വിശ്വാസി സമൂഹം അഭിനന്ദിച്ചു.
കലാപരിപാടികളും സമാപനവും
സണ്‍ഡേ സ്കൂള്‍ വിദ്യാര്‍ത്ഥികളുടെ സര്‍ട്ടിഫിക്കറ്റ് വിതരണവും കുട്ടികളും കുടുംബങ്ങളും ചേര്‍ന്നൊരുക്കിയ വിവിധ കലാ~സാംസ്കാരിക പരിപാടികളും സംഗമത്തിന് മാറ്റ് കൂട്ടി. ബോണ്‍ ഇടവക വികാരി റവ. ഡോ. ജോസഫ് ചേലമ്പറമ്പത്ത് അതിഥികളെ സ്വാഗതം ചെയ്യുകയും ട്രസ്ററി വര്‍ഗീസ് കര്‍ണ്ണാട്ടേശേരില്‍ നന്ദി രേഖപ്പെടുത്തുകയും ചെയ്തു. മെര്‍ലിന്‍ റിറ്റ്സ് ജര്‍മ്മന്‍ ഭാഷയിലും ജിറ്റി പാലത്തിങ്കല്‍ മലയാളത്തിലും പരിപാടികളുടെ അവതാരകരായി.
ബര്‍ലിന്‍, മാഗ്ഡെബുര്‍ഗ്, ഫ്രാങ്ക്ഫര്‍ട്ട്, ഹൈഡല്‍ബര്‍ഗ്, മ്യൂണിക്ക്, ക്രേഫെല്‍ഡ്, ഡോര്‍ട്ട്മുണ്ട് തുടങ്ങി ജര്‍മ്മനിയുടെ നാനാഭാഗങ്ങളില്‍ നിന്നുമെത്തിയ വൈദികരും സന്യസ്തരും അല്‍മായരും ഒത്തുചേര്‍ന്ന ഈ മഹാസംഗമം ജര്‍മ്മനിയിലെ മലങ്കര കത്തോലിക്കാ സമൂഹത്തിന്റെ ഐക്യവും സേവന സന്നദ്ധതയും ഊട്ടിയുറപ്പിക്കുന്ന വേദിയായി മാറി.
Comments: